TIRAKATAN SURAN, MAMPIR NONTON KI BENYEK
Penake dadi pengamat seni, nandi-nandi mung udhu cocot lan menang nyacat, nanging iki ora ateges idu ngreridu adol pangalembana, pancen Benyek mayange sansaya suwe sansaya resik, tatas-titis antawecana, saka sanggit sing lungit nganti garap gendhing disiapake kanthi premati. Mula ora gumun menawa para pamirsa tetep betah wungon lan tinon nganti buntasing lakon “Dewa Ruci” ngiras pantes tirakatan mangayubagya warsa anyar 1 Muharam 1431 Hijriah.
Ki Benyek pancen kalebu dhalang mudha sing potensial, eksplorasi seni, terobosan lan eksperimen garapan pedhalangan wis wola-wali oleh pambiji kang apik saka para pengamat seni pakeliran. Nanging ora lali Ki Benyek uga tetep kukuh nyekeli pakem, ora glirwaake menawa wayang iku kabudayan sing adiluhung kang ora pantes banget-banget kanggo guyon lan jag-jagan, mula crita sanggit mesthi dadi kawigaten sing baku.
Kanyata, sananjan ta Ki Benyek nggawa bala pangamping sindhen sing prigel ngolah lelagon dhangdhut lan Campur Sari, nanging satemene iku mung kanggo kembangan leladi murih para pamirsa mudha bisa nampa lan seneng marang wayang, ora keglithuk seni budaya manca.
Dhasar papan pasugatan bawera, jembar tur gasik, sajake kampung Gamping Tengah papane Ki Benyek mbabar kasantikan ngolah seni pedhalangan iku, isih padha ngugemi lan nguri-uri kabudayan jawa, khususe ringgit purwa. Panitia wus nyamektaake klasa kanggo lenggahan para pamirsa, mula para pamirsa mau lenggah jajar sila tumpang, adu dhengkul teka hamblabar munggeng kebonan.
Aku thenguk cedhak wit benguk nonton Ki Benyek mung udakara 2 jam, karana isih ana jejibahan liya sing kudu tak rampungake, mula sabubare perang kembang aku lengser mbadal pasilan saka sor wit gedhang, kanthi nggawa ati sing seneng, mongkog lan bombong, geneya Ngayogya sansaya akeh dhalang mudha sing bakal nerusake kabudayan jawa khususe seni pakeliran ringgit purwa, murih ora cures kalindhes ombyaking jaman.
Nuwun
Kijogogati
kijogogati.blogspot.com
0 komentar:
Posting Komentar
Sugeng Rawuh, lenggah sekeca kaaturan segahan sedhah kinang utawi dhahar ses, sinartan imbal wacana saha paring dhawuh panyaruwe.
Maturnuwun aturipun panyaruwe, sampun katampi kanthi sae, tumunten badhe kula aturaken nawala balesan.