Plengkung Gadhing
sauruting margi laksitaning wanci
yen awan kepanggang wengis
yen ratri sepi lamis
lenggahnya kesiku, kesaru
katali godhi mbeguguk ngutho waton
wingi uni wis dadi pesthen,
dina iki dadi pasren,
sesuk mung dadi impen.
Pancen.
Ilang salwiring walat welat
wirid japa mantra gung
sisip sembir kamiseseten.
gawar kentheng rante lawe
ngundha anglong, cinancang
ing wengku pengangen-angen.
Tebane mung alun-alun pengkeran
kumarane kajantur tanpa pocapan.
panggah,
Lengkunge memba lurung
taberi larung-larung
samubarang sing kedlarung,
dadi ilen-ilen tumetesing waspa
wuyung layung-layung.
Plengkung Gadhing, 24 September 2002.
KJG-
Sugeng Rawuh
pamartajawa ayo-ayo samya udhu "wiji" klungsu, dhudhah-dhudhah budaya jawa, jajag-jajag kedhunge basa, pawitan suku jaja ateken janggut, pawadan sregep tinon lan takon, cukla-cukli mbremana sandhi, pancadan sumarah manembah mring kersane Hyang Widhi Wasesa. dimen lestari jiwa jawi wani anjawani anjarwani...
Sugeng Rawuh Sanggar Sastra Jawa, Ketoprak, Wayang, Pranatacara, paes lan tari, Yudhistira 5, Banguntapan, Bantul, Ngayogyakarta....
Urip Sejati, Sejati Urip Urip iku rasa, rasa iku urip, urip tanpa rasa iku reca. wira wiri ora rumangsa wirang karana wus ilang rasane den samudana ora krasa, direrepa ora rumangsa, disendhu ora digugu, dipenggak nyangkal tenggak, digatra sansaya ndadra Atine tan tanggap, esmune sepi ing sasmita, meguguk mangutha waton, mbondhan tanpa ratu watake pekok tan kena ginepok alok, sikepe mbedhug boten kinukup ing gludhug
Rabu, 11 Februari 2009
Langganan:
Posting Komentar (Atom)
Gunungan Kayon Gapuran
Gunungan isi kayu lan watu, adoh ratu cedhak banyu, aja sinengguh iku wuwu, mlebua dimen ngerti sejatining ngelmu
Kijogo
salam.... srumuwus ngrantos jawah dhawah sonten ing mangsa ketiga ngglanthang, klapa sansaya isi santen, sak sintena kasuwun mendha ing nala, supados boten lingsem menawi tuwuh bebanten. Kurawa mati ora rugi, pendhawa mukti ora methik bathi,ana kraman munggeng wuwungan becike baris pendhem nyimpang dalan, duwe mungsuh siji wis kakean, meneng anteng aja nggembol kreneng, tamtu bakal sugih jeneng. ee..jarene urip iku mung mampir ngombe, nanging genea uripku nglambrang lan tansah kebak panandhang?? Aku ngenteni padhang sumilaking tawang..
Senthong Tengah
- Kijogogati
- Mugya tinebihna tulaksarik saha walat sengker, katur pra jamhur budaya, kepareng Kijogogati, lumarap sowan tanpa cecala tebih ing bawera saha subasita, namung sangu karep krenteg nalar cupet, sedya hangulir rasa hamesu budi, ndherek dhudhah-dhudhah kabudayan adiluhung jawi , hamerdi sejatining ngelmi, sedya nyesep tetes sari-sarining warih suci hanuju gesang mardi siwi, hamemayu hayuning sesami. Nuwun.
0 komentar:
Posting Komentar
Sugeng Rawuh, lenggah sekeca kaaturan segahan sedhah kinang utawi dhahar ses, sinartan imbal wacana saha paring dhawuh panyaruwe.
Maturnuwun aturipun panyaruwe, sampun katampi kanthi sae, tumunten badhe kula aturaken nawala balesan.